នាព្រឹកថ្ងៃទី ២៩ ខែឧសភា ឆ្នាំ២០២៦ មានការរៀបចំពិធីដាឆ្លងផ្លូវក្រាលថ្មមិចពីរកែងវត្តទៅទីទួលស្នួល ដែលមានប្រវែង ៣០០ ម៉ែត្រ និងទទឹង ៤ ម៉ែត្រ ព្រមទាំងពិធីសម្ពោធដាក់ឱ្យប្រើប្រាស់ផ្លូវបេតុងមួយខ្សែ ប្រវែង ៨០ ម៉ែត្រ និងទទឹង ២ ម៉ែត្រ ។ ក្រោមការឧបត្ថម្ភ ពីសម្តេច ព្រះពោធិវ័ង កក្តិបណ្ឌិត ណយ ច្រឹក ព្រះសង្ឃនាយកទី១ នៃព្រះរាជាណាចក្រកម្ពុជា។ តាមរយះលោក ប៊ិន ឡាដា អភិបាលស្រុកស្រីសន្ធរ ស្ថិតនៅសាលាបឋមសិក្សាភូមិក្សេរ ឃុំព្រែករំដេង ស្រុកស្រីសន្ធរ ខេត្តកំពង់ចាម។
ពិធីនេះប្រព្រឹត្តទៅក្រោមអធិបតីភាព លោក ប៊ិន ឡាដា អភិបាលស្រុកស្រីសន្ធរ ដោយមានការចូលរួមពីអាជ្ញាធរភូមិ-ឃុំ ព្រះចៅអធិការ គណៈកម្មការ ពុទ្ធបរិស័ទ លោកគ្រូ អ្នកគ្រូ សិស្សានុសិស្ស និងក្រុមកម្លាំងសាមគ្គីយុវជនភូមិក្សេរផងដែដែរ។
បន្ទាប់ពីពិធីសម្ពោធ លោកអភិបាលស្រុកបានជួបពិភាក្សា និងដោះស្រាយបញ្ហានានានៅក្នុងភូមិ ដែលជាសំណូមពររបស់ប្រជាពលរដ្ឋ។ ជាមួយគ្នានេះ លោកក៏បានណែនាំអំពីការគ្រប់គ្រងសំរាមឱ្យមានរបៀបរៀបរយ និងបានអំពាវនាវឱ្យប្រជាពលរដ្ឋចូលរួមបង់ថ្លៃសេវាប្រមូលសំរាម ដើម្បីរួមចំណែកថែរក្សាបរិស្ថានឱ្យស្អាត មានសណ្តាប់ធ្នាប់ និងលើកកម្ពស់សុខភាពសហគមន៍។
ជាពិសេស លោកអភិបាលស្រុកបានស្នើសុំឱ្យក្រុមហ៊ុនប្រមូលសំរាមលើកលែងការបង់ថ្លៃសេវារយៈពេល ២ ខែដំបូង ដែលធ្វើឱ្យប្រជាពលរដ្ឋមានការសប្បាយរីករាយ និងសាទរយ៉ាងខ្លាំង។
ក្រោយបញ្ចប់កម្មវិធី លោកអភិបាលស្រុកស្រីសន្ធរ បានដឹកនាំក្រុមការងារ និងកម្លាំងសាមគ្គីយុវជនចុះពិនិត្យទីតាំងចោលសំរាមជាក់ស្តែង ហើយបានសម្របសម្រួលឱ្យក្រុមហ៊ុនប្រមូលសំរាមដឹកជញ្ជូនសំរាមចេញពីទីតាំងនោះភ្លាមៗ ដើម្បីទប់ស្កាត់ការចោលសំរាមពាសវាលពាសកាលពីសំណាក់ប្រជាពលរដ្ឋមកពីទីជិត និងទីឆ្ងាយ។
ទន្ទឹមនឹងនេះ លោកអភិបាលស្រុកក៏បានឧបត្ថម្ភអំពូលសូឡាចំនួន ២ គ្រាប់ ដំឡើងនៅទីតាំងនោះ ដើម្បីជួយរក្សាបរិស្ថាន សណ្តាប់ធ្នាប់ និងសោភ័ណភាពតាមដងផ្លូវក្នុងភូមិ-ឃុំ ឱ្យកាន់តែល្អប្រសើរឡើង។
សូមអរគុណចំពោះការយកចិត្តទុកដាក់ និងការគាំទ្ររបស់អាជ្ញាធរ ក្រុមការងារ និងប្រជាពលរដ្ឋទាំងអស់ ដែលបានរួមចំណែកអភិវឌ្ឍមូលដ្ឋានឱ្យកាន់តែរីកចម្រើន។ 🙏
