ពិធីសំណេះសំណាល និងប្រកាសបញ្ចូលសមាជិក-សមាជិកាថ្មី ៤០០នាក់ របស់គណបក្សសង្កាត់ចាក់អង្រែក្រោម ប្រព្រឹត្តទៅនៅគណបក្សប្រជាជនខណ្ឌមានជ័យ
ភ្នំពេញ៖ គណបក្សសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានរៀបចំពិធីសំណេះសំណាល និងប្រកាសបញ្ចូលសមាជិក-សមាជិកាថ្មីចំនួន ៤០០នាក់ នាព្រឹកថ្ងៃសៅរ៍ ទី២៥ ខែកក្កដា ឆ្នាំ២០២៦នេះ នៅសាលាគណបក្សប្រជាជនកម្ពុជាខណ្ឌមានជ័យ ក្រោមអធិបតីភាព លោក សេង គន្ធ ប្រធានគណៈកម្មាធិការគណបក្សប្រជាជនកម្ពុជាខណ្ឌមានជ័យ និងជាអនុប្រធានក្រុមការងារចុះមូលដ្ឋានសង្កាត់ចាក់អង្រែក្រោម។
ពិធីនេះបានប្រព្រឹត្តទៅក្នុងបរិយាកាសស្និទ្ធស្នាល អធិកអធម និងពោរពេញដោយសាមគ្គីភាព ដោយមានការចូលរួមពីថ្នាក់ដឹកនាំគណបក្ស ថ្នាក់ដឹកនាំមូលដ្ឋាន សមាជិក សមាជិកា និងភ្ញៀវកិត្តិយសជាច្រើនរូប។
ក្នុងឱកាសនោះ លោក សេង គន្ធ បានសម្តែងការអបអរសាទរចំពោះសមាជិក-សមាជិកាថ្មីទាំង ៤០០នាក់ ដែលត្រូវបានប្រកាសបញ្ចូលជាសមាជិកគណបក្សប្រជាជនកម្ពុជាជាផ្លូវការ។ លោកបានលើកឡើងថា ការប្រកាសបញ្ចូលសមាជិកថ្មីនាពេលនេះ គឺជាលទ្ធផលនៃការយកចិត្តទុកដាក់លើការងារចាត់តាំង និងការពង្រឹងមូលដ្ឋានគណបក្ស ស្របតាមទិសដៅពង្រឹងសាមគ្គីភាពផ្ទៃក្នុង និងលើកកម្ពស់ប្រសិទ្ធភាពការងារនៅមូលដ្ឋាន។
លោក សេង គន្ធ ក៏បានជំរុញឱ្យសមាជិក-សមាជិកាថ្មីទាំងអស់ បន្តប្រកាន់ខ្ជាប់លក្ខន្តិកៈ និងបទបញ្ជាផ្ទៃក្នុងរបស់គណបក្ស ពង្រឹងសាមគ្គីភាព យកចិត្តទុកដាក់បំពេញតួនាទី និងភារកិច្ចរបស់ខ្លួនប្រកបដោយការទទួលខុសត្រូវខ្ពស់ ព្រមទាំងរួមចំណែកថែរក្សាសន្តិភាព ស្ថិរភាពនយោបាយ សណ្តាប់ធ្នាប់សង្គម និងជំរុញការអភិវឌ្ឍមូលដ្ឋានឱ្យកាន់តែរីកចម្រើន។
លោកក៏បានណែនាំឱ្យសមាជិក-សមាជិកាទាំងអស់ បន្តរក្សាទំនាក់ទំនងជិតស្និទ្ធជាមួយប្រជាពលរដ្ឋ ស្តាប់ និងដោះស្រាយសំណូមពរនានានៅមូលដ្ឋាន ស្របតាមគោលការណ៍ «បម្រើប្រជាពលរដ្ឋដោយស្មោះត្រង់ និងមានប្រសិទ្ធភាព» ដើម្បីរួមចំណែកលើកកម្ពស់ការអភិវឌ្ឍ និងសុខុមាលភាពរបស់ប្រជាពលរដ្ឋ។
ការប្រកាសបញ្ចូលសមាជិក-សមាជិកាថ្មីចំនួន ៤០០នាក់ នាឱកាសនេះ បានបង្ហាញពីការបន្តពង្រឹងការងារចាត់តាំង និងការពង្រីកសមាជិកភាពរបស់គណបក្សប្រជាជនកម្ពុជានៅសង្កាត់ចាក់អង្រែក្រោម ដែលជាកម្លាំងដ៏សំខាន់ក្នុងការចូលរួមអនុវត្តគោលនយោបាយរបស់គណបក្ស និងរួមចំណែកអភិវឌ្ឍមូលដ្ឋានឱ្យកាន់តែរឹងមាំ។
