ឯកឧត្តម ស៊ុយ ឆៃលាង អញ្ជើញចុះជួបសំណេះសំណាល និងលើកស្លាកគណបក្សប្រជាជនកម្ពុជា នៅស្រុកកណ្តាលស្ទឹង ខេត្តកណ្តាល

 ឯកឧត្តម ស៊ុយ ឆៃលាង អញ្ជើញចុះជួបសំណេះសំណាល និងលើកស្លាកគណបក្សប្រជាជនកម្ពុជា នៅស្រុកកណ្តាលស្ទឹង ខេត្តកណ្តាល

កណ្តាល៖ នៅថ្ងៃអាទិត្យ ១១រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែសីហា ឆ្នាំ២០២៦ ឯកឧត្តម ស៊ុយ ឆៃលាង ប្រធានក្រុមការងារចលនាកសាងសមាជិកខេត្តកណ្តាល តំណាងដ៏ខ្ពង់ខ្ពស់របស់ឯកឧត្តម គួច ចំរើន ប្រធានគណៈកម្មាធិការគណបក្សខេត្តកណ្តាល បានអញ្ជើញចុះជួបសំណេះសំណាលជាមួយសមាជិក សមាជិកា និងប្រជាពលរដ្ឋ ព្រមទាំងអញ្ជើញចូលរួមក្នុងពិធីលើកស្លាកគណបក្សប្រជាជនកម្ពុជា នៅភូមិព្រែកតាថុក ឃុំព្រែកស្លែង ស្រុកកណ្តាលស្ទឹង ខេត្តកណ្តាល។

ពិធីនេះរៀបចំឡើងក្នុងបរិយាកាសស្និទ្ធស្នាល និងកក់ក្តៅ ដោយមានការចូលរួមពីថ្នាក់ដឹកនាំក្រុមការងារ មន្ត្រីគណបក្សមូលដ្ឋាន សមាជិក សមាជិកា និងប្រជាពលរដ្ឋក្នុងមូលដ្ឋានយ៉ាងច្រើនកុះករ។

ក្នុងឱកាសនោះ ឯកឧត្តម ស៊ុយ ឆៃលាង បានជួបសំណេះសំណាល សួរសុខទុក្ខ និងស្តាប់មតិយោបល់ ព្រមទាំងក្តីកង្វល់ និងសំណូមពរផ្សេងៗរបស់ប្រជាពលរដ្ឋ និងសមាជិក សមាជិកាគណបក្សនៅមូលដ្ឋាន។ ការចុះជួបផ្ទាល់នេះ ក៏ជាឱកាសសម្រាប់ក្រុមការងារពង្រឹងទំនាក់ទំនងជាមួយមូលដ្ឋាន និងស្វែងយល់កាន់តែច្បាស់ពីស្ថានភាពជាក់ស្តែងរបស់ប្រជាពលរដ្ឋនៅតាមមូលដ្ឋានផងដែរ។

ជាមួយគ្នានេះ ការលើកស្លាកគណបក្សប្រជាជនកម្ពុជានៅភូមិព្រែកតាថុក ក៏បានបង្ហាញពីសកម្មភាពការងាររបស់ក្រុមការងារគណបក្សនៅមូលដ្ឋាន ក្នុងការពង្រឹងសកម្មភាព និងការចូលរួមរបស់សមាជិក សមាជិកា ព្រមទាំងការរក្សាទំនាក់ទំនងជិតស្និទ្ធជាមួយប្រជាពលរដ្ឋ។

ឯកឧត្តម ស៊ុយ ឆៃលាង ក៏បានលើកទឹកចិត្តដល់សមាជិក សមាជិកាគណបក្ស និងក្រុមការងារមូលដ្ឋាន ឱ្យបន្តខិតខំបំពេញតួនាទី និងភារកិច្ចរបស់ខ្លួនដោយស្មារតីទទួលខុសត្រូវ សាមគ្គីភាព និងសហការគ្នាឱ្យបានល្អប្រសើរ ដើម្បីរួមចំណែកដល់ការងារគណបក្ស និងការអភិវឌ្ឍមូលដ្ឋាន។

ពិធីជួបសំណេះសំណាល និងលើកស្លាកគណបក្សប្រជាជនកម្ពុជានេះ បានបញ្ចប់ទៅក្នុងបរិយាកាសរីករាយ ស្និទ្ធស្នាល និងប្រកបដោយសាមគ្គីភាព ដោយថ្នាក់ដឹកនាំ ក្រុមការងារ សមាជិក សមាជិកា និងប្រជាពលរដ្ឋ បានបង្ហាញនូវការចូលរួម និងការគាំទ្រចំពោះសកម្មភាពការងារនៅមូលដ្ឋាន។