លោកឧត្តមសេនីយ៍ត្រី ម៉េង ស្រ៊ុន បានអញ្ជើញដឹកនាំក្រុមការងារកងអាវុធហត្ថខេត្តកំពង់ស្ពឺ ចុះសួរសុខទុក្ខ ជួបសំណេះសំណាលសម្តែងការគួរសមនិងបានឧបត្ថម្ភជាថវិការសម្ភារៈជូនដល់ ឯកឧត្តម ទេព មាន សមាជិកក្រុមប្រឹក្សាខេត្ត អនុប្រធានគណបក្សខេត្ត...
កំពង់ស្ពឺ៖ដោយយកគំរូដឹកនាំដ៏បុិនប្រសពឈ្លាសវៃ ប្រកបដោយគុណធម៌ របស់លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ នៅថ្ងៃទី៥ ខែវិច្ឆិកា ឆ្នាំ២០២៦ វេលាម៉ោង១០.៣០នាទីព្រឹក លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បានអញ្ជើញដឹកនាំក្រុមការងារកងអាវុធហត្ថនិងមានការចូលរួមពីក្រុមការងារសហភាពសហព័ន្ធយុវជនកម្ពុជាខេត្ត ក្រុមការងារស្ម័កចិត្តកាកបាទក្រហមសាខាខេត្តកំពង់ស្ពឺ ព្រមទាំងមានការចូលរួមពីសមាគមនារីកម្ពុជាដើម្បីសន្តិភាពនិងអភិវឌ្ឍន៍ខេត្ត ចុះសួរសុខទុក្ខ ជួបសំណេះសំណាលសម្តែងការគួរសមនិងបានឧបត្ថម្ភជាថវិការសម្ភារៈជូនដល់ ឯកឧត្តម ទេព មាន អាយុ៧៣ឆ្នាំ សមាជិកក្រុមប្រឹក្សាខេត្ត អនុប្រធានគណបក្សខេត្ត និងជាប្រធានគណៈឃោសនាអប់រំគណបក្សខេត្ត កំពុងសម្រាកថែទាំសុខភាពជំងឺផ្នែកព្យាបាលដោយចលនា នៅមន្ទីរពេទ្យបង្អែកខេត្តកំពង់ស្ពឺ។លោកឧត្តមសេនីយ៍ត្រី ម៉េង ស្រ៊ុន ជាចិត្តសប្បុរសផ្តើមចេញពីសទ្ធា និងចិត្តស្មោះ ជួយសម្រាលទុក្ខលំបាក បានឧបត្ថម្ភជាថវិកាចំនួន ៥០០,០០០៛និងផ្លែឈើ១កន្ត្រក ជូនដល់ ឯកឧត្តម ទេព មាន ផងដែរ។
ក្នុងឱកាសដ៏វិសេសវិសាលនៃការចុះសួរសុខទុក្ខនាពេលនេះ លោកឧត្តមសេនីយ៍ត្រី ម៉េង ស្រ៊ុន រួមនឹងក្រុមការងារទាំងអស់គ្នា បានសំណេះសំណាលសម្តែងការគួរសមព្រមទាំង គោរពជូនពរ ឯកឧត្តម ទេព មាន អោយឆាប់បានជាសះស្បើយ សូមមានសុខភាពល្អបរិបូរណ៍ កម្លាំងមាំមួន ប្រាជ្ញាឈ្លាសវៃ និងមានជន្មាយុយឺនយូរ ដើម្បីបន្តដឹកនាំការងារ ឆ្ពោះទៅរកភាពរីកចម្រើន និងជោគជ័យដ៏ត្រចះត្រចង់បន្ថែមទៀត។ជាពិសេសសូមបួងសួងដល់វត្ថុស័ក្តិសិទ្ធិក្នុងលោក តាមជួយបីបាច់ថែរក្សា ឯកឧត្តម និងលោកជំទាវ ព្រមទាំងក្រុមគ្រួសារ ឱ្យជួបតែសេចក្តីសុខ សេចក្តីចម្រើន និងសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕














