ក្រោមស្មារតីមនុស្សធម៌ដើម្បីជាតិនិងប្រជាជន!លោកឧត្តមសេនីយ៍ត្រី ម៉េង ស្រ៊ុន និងក្រុមគ្រួសារ ព្រមទាំងសប្បុរសជន បានអញ្ជើញបន្តចុះសួរសុខទុក្ខនិងនាំយកនូវអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ សៅ សុខា ព្រមទាំងសម្ភារៈមួយចំនួនធំទៀតដែលទទួលបានពីការចូលរួមរបស់សប្បុរសជនទាំងក្នុងនិងក្រៅស្រុក ឧបត្ថម្ភដល់បងប្អូនជនភៀសសឹកសរុបចំនួន៨០០គ្រួសារ ក្នុងនោះមានសិស្សានុសិស្សចំនួន៤៥០នាក់ និងទារកចំនួន៦០នាក់ នៅមណ្ឌលសុវត្ថិភាពចំនួន២ទីតាំង ក្នុងខេត្តសៀមរាប...
កំពង់ស្ពឺ៖កាលពីរសៀលថ្ងៃទី២៣ ខែធ្នូ ឆ្នាំ២០២៥ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងក្រុមគ្រួសារព្រមទាំងសប្បុរសជន រួមទាំងក្រុមការងារកងរាជអាវុធហត្ថ បានអញ្ជើញបន្តចុះសួរសុខទុក្ខនិងនាំយកនូវអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងសម្ភារៈមួយចំនួនធំទៀត ដែលទទួលបានពីការចូលរួមរបស់សប្បុរសជន ឧបត្ថម្ភដល់បងប្អូនជនភៀសសឹកដែលកំពុងគេចខ្លួនពីសង្គ្រាមមកនៅទីទួលសុវត្ថិភាព ចំនួន៨០០គ្រួសារ (ក្នុងនោះមានសិស្សានុសិស្សចំនួន៤៥០នាក់ និងទារកចំនួន៦០នាក់)នៅមណ្ឌលសុវត្ថិភាពចំនួន២ទីតាំង ស្ថិតក្នុងភូមិខ្នាយ ឃុំសសរស្ដម្ភ ស្រុកពួក ខេត្តសៀមរាប។
ខណៈនាពេលនោះ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ បានសំណេះសំណាលជាមួយបងប្អូនប្រជាពលរដ្ឋជនភៀសសឹកដោយក្តីអាណិតអាសូរពន់ពេក ដែលត្រូវឃ្លាតឆ្ងាយពីផ្ទះសំបែង ដោយសារតែការឈ្លានពានរបស់កងទ័ពចោរសៀមមកលើដែនអធិបតេយ្យភាពកម្ពុជា។ជាពិសេសក៏បានពាំនាំនូវការផ្តាំផ្ងើរសួរសុខទុក្ខនិងព្រួយបារម្មណ៏បំផុតពីសំណាក់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាល ខេត្តកំពង់ស្ពឺ។
សម្រាប់អំណោយរបស់ឯកឧត្តម នាយឧត្តមសេនីយ៍ សៅ សុខា ព្រមទាំងសម្ភារៈមួយចំនួនធំទៀតដែលទទួលបានពីការចូលរួមរបស់សប្បុរសជន
ត្រូវបានប្រគល់ជូនបងប្អូនប្រជាពលរដ្ឋភៀសសឹកទាំង២ទីតាំងសរុបមានចំនួន៨០០គ្រួសារ ដោយក្នុងមួយគ្រួសារៗទទួលបាននូវគ្រឿងឧបភោគបរិភោគ សម្ភារៈប្រើប្រាស់ចាំបាច់ និងថវិកាមួយចំនួន ចំណែកសិស្សានុសិស្សចំនួន៤៥០នាក់ ដោយក្នុងម្នាក់ៗទទួលបាន (សៀវភៅសិក្សា សៀវភៅនិទាន សៀវភៅគំនូរ សៀវភៅសរសេរ គូល័រផាត់ព័ណ នំពងទា ពងមាន់ )និងអាហារូបត្ថម្ភផ្សេងៗទៀត រីឯចំពោះទារកអាយុក្រោម២ឆ្នាំ ចំនួន៦០នាក់ ក្នុងម្នាក់ៗទទួលបានសម្ភារៈទារក និងអាហារូបត្ថម្ភមួយចំនួនទៀតផងដែរ សម្រាប់ប្រើប្រាស់ប្រចាំថ្ងៃ។
ឆ្លៀតក្នុងឱកាសនោះដែរ លោកឧត្តមសេនីយ៍ត្រី ម៉េង ស្រ៊ុន បានមានប្រសាសន៍ លើកទឹកចិត្តនិងសូមឲ្យប្រជាពលរដ្ឋទាំងអស់ជឿជាក់លើរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងការបន្តដឹកនាំប្រកបដោយភាពឈ្លៀសវៃប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងសូមគាំទ្រចំពោះយុទ្ធសាស្ត្រ “ស្ងាត់តែមិនស្ងៀម” របស់សម្តេចធិបតីនាយករដ្ឋមន្ត្រី ដែលកំពុងតែអនុវត្តការងារយ៉ាងសកម្មមមាញឹកបំផុត ដើម្បីស្វែងរកសុខសន្តិភាព និងសុខសុវត្ថិភាពជូនប្រជាពលរដ្ឋទូទាំងប្រទេស។
ជាការពិតណាស់ សកម្មភាពមនុស្សធម៌នេះ បានបង្ហាញឲ្យឃើញអំពីការយកចិត្តទុកដាក់ ក្នុងស្មារតីជាតិនិយមខ្ពស់បំផុត របស់សប្បុរសជនទាំងអស់ ដែលបានរួមជាកម្លាំងមហាសាមគ្គីជាតិជាធ្លុងមួយ ក្រោមស្មារតីខ្មែរស្រឡាញ់ខ្មែរ ខ្មែរជួយខ្មែរ ដើម្បីឈរនៅពីក្រោយវីរកងទ័ពគ្រប់រូប ដែលកំពុងឈរជើង បំពេញបេសកកម្មយ៉ាងអង់អាចក្លាហាន ក្នុងការការពារអធិបតេយ្យភាព និងបូរណភាពទឹកដីរបស់កម្ពុជា៕
