នាព្រឹកថ្ងៃទី១៦ ខែមីនា ឆ្នាំ២០២៦ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលសកម្មភាពការងារចុះមូលដ្ឋានក្នុងឆ្នាំ២០២៥ និងលើកទិសដៅការងារបន្តសម្រាប់ឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តក្រចេះ។
ក្នុងឱកាសនោះ ឯកឧត្តម សុខ ចាន់ភក្តី រដ្ឋលេខាធិការក្រសួងព័ត៌មាន ក៏បានអញ្ជើញចូលរួម និងឡើងធ្វើបទបង្ហាញអំពីលទ្ធផលការងារ បញ្ហាប្រឈម និងស្ថានភាពជាក់ស្តែងនៅក្នុងមូលដ្ឋានស្រុកចិត្របុរី ដើម្បីរួមចំណែកពង្រឹងប្រសិទ្ធភាពការងាររបស់ក្រុមការងាររាជរដ្ឋាភិបាលក្នុងការចុះបម្រើ និងដោះស្រាយបញ្ហាជូនប្រជាពលរដ្ឋនៅមូលដ្ឋានឱ្យកាន់តែមានប្រសិទ្ធភាព។
កិច្ចប្រជុំនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ សមាជិក សមាជិកា នៃក្រុមការងាររាជរដ្ឋាភិបាលចុះមូលដ្ឋានថ្នាក់ខេត្ត ក្រុង ស្រុក ព្រមទាំងថ្នាក់ដឹកនាំរដ្ឋបាលខេត្ត និងមន្ទីរ អង្គភាពពាក់ព័ន្ធជាច្រើនរូប សរុបប្រមាណជិត ៥០០ នាក់។ កម្មវិធីនេះត្រូវបានរៀបចំឡើងនៅសាលមហោស្រពខេត្តក្រចេះ ក្នុងបរិយាកាសយ៉ាងសកម្ម និងមានន័យសំខាន់ក្នុងការពង្រឹងសមត្ថភាព និងការសម្របសម្រួលការងាររបស់ក្រុមការងាររាជរដ្ឋាភិបាលចុះមូលដ្ឋាន។
ជាមួយគ្នានេះផងដែរ កិច្ចប្រជុំក៏បានផ្តោតលើកា
រពិភាក្សា និងផ្លាស់ប្តូរយោបល់អំពីបទពិសោធន៍ការងារចុះមូលដ្ឋាន ការទទួលស្គាល់បញ្ហាប្រឈមនានា និងការស្វែងរកដំណោះស្រាយសមស្រប ដើម្បីធានាឱ្យការអនុវត្តគោលនយោបាយរបស់រាជរដ្ឋាភិបាលសម្រេចបានលទ្ធផលល្អប្រសើរបន្ថែមទៀត។ កិច្ចប្រជុំនេះក៏ជាវេទិកាសំខាន់មួយសម្រាប់ការពង្រឹងសាមគ្គីភាព ការសហការរវាងថ្នាក់ដឹកនាំ និងមន្ត្រីពាក់ព័ន្ធក្នុងការបំពេញភារកិច្ចបម្រើប្រជាពលរដ្ឋនៅតាមមូលដ្ឋានឱ្យកាន់តែមានប្រសិទ្ធភាព និងច្បាស់លាស់។